వస్త్ర పరిశ్రమపై జీఎస్టీ రేటును యధావిధిగా కొనసాగించనున్నట్లు ఆర్థికమంత్రి నిర్మలా సీతారామన్ ప్రకటించారు. వస్త్రాలపై ఇప్పుడున్న జీఎస్టీ రేటు 5 శాతాన్ని అదేవిధంగా కొనసాగించాలని, దానిని 12 శాతానికి పెంచొద్దని జీఎస్టీ కౌన్సిల్ సమావేశంలో నిర్ణయించినట్లు ఆమె తెలిపారు.
వస్త్రాలపై జీఎస్టీ రేటు అంశాన్ని పన్ను రేట్ల హేతుబద్ధీకరణ కమిటీకి పంపుతామని, ఆ కమిటీ ఫిబ్రవరిలోగా తన నివేదికను సమర్పిస్తుందని నిర్మలా సీతారామన్ చెప్పారు. కేంద్ర ఆర్థిక మంత్రి అధ్యక్షతన దేశ రాజధానిలో జరిగిన జిఎస్‌టి కౌన్సిల్ అత్యవసర సమావేశంలో వస్త్రాలపై జిఎస్‌టి రేటు యథాతథ స్థితిని కొనసాగించాలని నిర్ణయం తీసుకున్నారు.
ఈ సమావేశంలో టెక్స్‌టైల్ సమస్య గురించి మాత్రమే చర్చించామని, పాదరక్షలపై జీఎస్టీ పెంపు అంశం చర్చించలేదని ఆర్థిక మంత్రి తెలిపారు. సెప్టెంబరు 17న లక్నోలో జరిగిన జీఎస్టీ కౌన్సిల్ సమావేశంలో జౌళి, పాదరక్షల వస్తువులపై జీఎస్టీని 5 శాతం నుంచి 12 శాతానికి పెంపు నిర్ణయం జనవరి 1, 2022 నుంచి అమలు చేయాలని నిర్ణయం తీసుకున్నారు.
‘మేం జీఎస్టీపై యథాతథ స్థితిని కొనసాగిస్తున్నాం. జీఎస్టీని 5 శాతం నుంచి 12 శాతానికి పెంచకూడదని నిర్ణయించాం’ అని జీఎస్టీ కౌన్సిల్ సమావేశం తర్వాత మీడియా సమావేశంలో సీతారామన్ అన్నారు.
యూపీలోని కాన్పూర్, ఉన్నావ్‌లో సుగంధ పరిమళాల వ్యాపారుల ఆస్తులపై సోదాలకు సంబంధించిన ఆరోపణలపై ఆర్థిక మంత్రి నిర్మలా సీతారామన్ స్పందించారు. ‘సరైన ప్రదేశాల్లో దాడులు జరిగాయి. ఈ సోదాల వల్ల యూపీ మాజీ ముఖ్యమంతిర్ అఖిలేష్ యాదవ్ భయపడి, కదిలిపోయారా?’ అంటూ ఆమె ఎద్దేవా చేశారు.
గత, సెప్టెంబరులో జరిగిన కౌన్సిల్ సమావేశంలో పన్నుల నిర్మాణాన్ని మార్చడంపై తీసుకున్న నిర్ణయాన్ని వాయిదా వేయాలని గుజరాత్ ఆర్థిక మంత్రి అభ్యర్థించడంతో ప్రస్తుత సమావేశం జరిపామని సీతారామన్ చెప్పారు.
“పన్ను నిర్మాణంలో విలోమాన్ని సరిచేసే ప్రక్రియలో సెప్టెంబర్ లో నిర్ణయం తీసుకున్నాము” అని ఆమె చెప్పారు. 2019 నుండి, జీఎస్టీ కౌన్సిల్ సుమారు 10 అంశాలలో విలోమ విధి నిర్మాణంలో అటువంటి సవరణను పరిగణించింది ఆమె పేర్కొన్నారు. రెండు రోజుల క్రితం, తెలంగాణ మంత్రి కె టి రామారావు కూడా ఈ నిర్ణయం ఉపసంహరించుకోమని కోరుతూ కేంద్రంకు లేఖ వ్రాసారు.
గత వారం, పశ్చిమ బెంగాల్ ముఖ్యమంత్రికి ప్రిన్సిపల్ చీఫ్ అడ్వైజర్ అమిత్ మిత్రా, ప్రతిపాదిత పెంపును వెనక్కి తీసుకోవాలని కేంద్ర ఆర్ధిక మంత్రి నిర్మలా సీతారామన్‌ను కోరారు. కొత్త రేట్ల నిర్మాణం వల్ల దాదాపు లక్ష టెక్స్‌టైల్ యూనిట్లు మూతపడతాయని, జాతీయ స్థాయిలో 15 లక్షల ఉద్యోగాలు నష్టపోతాయని ఆయన తెలిపారు.
