తెలంగాణలో దాదాపు రూ.80 వేల కోట్లకుపైగా విలువైన రైల్వే ప్రాజెక్టులు నిర్మించేందుకు నరేంద్ర మోదీ ప్రభుత్వం ప్రణాళికలు సిద్ధం చేసిందని కేంద్ర మంత్రి జి.కిషన్‌రెడ్డి వెల్లడించారు. తెలంగాణలోని 33 జిల్లాలకు, లక్ష పైచిలుకు జనాభా ఉన్న పట్టణాలకు రైల్వే కనెక్టివిటీ కల్పించడమే లక్ష్యంగా ప్రయత్నాలు ప్రారిభించినట్లు స్పష్టం చేశారు.
రాష్ట్రంలో ప్రముఖ దేవాలయాలైన భద్రాచలం, రామప్ప, మేడారం వంటి ఆధ్యాత్మిక క్షేత్రాలకూ రైలుమార్గం రానుందని చెప్పారు. రాష్ట్రంలో 15 కొత్త రైల్వే లైన్లు, మరో 15 అదనపు లైన్లు కలిపి మొత్తం 30 ప్రాజెక్టులకు రైల్వేశాఖ తుది సర్వే మంజూరు చేసిందని వివరించారు.
రూ.5,706 కోట్ల వ్యయంతో ఆదిలాబాద్‌- నిర్మల్‌- పటాన్‌చెరు ప్రాజెక్టును కేంద్రం చేపట్టనుందని కిషన్ రెడ్డి వెల్లడించారు. ఈ రైల్ మార్గం వల్ల ఉత్తర తెలంగాణతో.. రాష్ట్ర, దేశ రాజధానులు అనుసంధానమవుతాయని అన్నారు. ఆదిలాబాద్‌, ఇచ్చోడ, నేరడిగొండ, నిర్మల్‌, బాల్కొండ, ఆర్మూర్‌, బోధన్‌, బాన్సువాడ, నిజాంపేట, సంగారెడ్డి మీదుగా పటాన్‌చెరు వరకు ఈ మార్గం ఉంటుందని చెప్పారు.
ఉందానగర్‌-జగ్గయ్యపేట మార్గం చిట్యాల, నకిరేకల్‌, సూర్యాపేట మీదుగా 65వ నంబరు జాతీయ రహదారికి సమాంతరంగా వెళ్తుందని కిషన్ రెడ్డి వెల్లడించారు. ఈ మార్గం తెలుగు రాష్ట్రాల రాజధానులు హైదరాబాద్‌, అమరావతిని కలిపే అతి తక్కువ దూరం మార్గంగా అవుతుందని చెప్పారు.
564 కిలోమీటర్ల రీజినల్‌ రింగ్‌ రైలు ప్రాజెక్టుకు రూ.12,408 కోట్ల వ్యయమవుతుందని కేంద్రం అంచనా వేసినట్లు చెప్పారు. తెలంగాణ అభివృద్ధిలో ఈ ప్రాజెక్టు గేమ్‌ ఛేంజర్‌గా మారుతుందని కిషన్ రెడ్డి తెలిపారు. రీజినల్‌ రింగ్‌ రైలు ప్రాజెక్టుతో వికారాబాద్‌, సంగారెడ్డి, మెదక్‌, సిద్దిపేట, గజ్వేల్‌, యాదాద్రి, భువనగిరి, చిట్యాల, షాద్‌నగర్‌, షాబాద్‌ అనుసంధానమవుతాయని వివరించారు.
చర్లపల్లి, ఉందానగర్‌, సికింద్రాబాద్‌ స్టేషన్ల పనులకు, రైల్వే లైన్ల నిర్మాణానికి భూసేకరణలో సహకరించాలని తెలంగాణ ముఖ్యమంత్రి కేసీఆర్‌కు లేఖ రాసినా అట్నుంచి స్పందన లేదని కేంద్ర మంత్రి ధ్వజమెత్తారు. రాష్ట్రంలో రాబోయేది బిజెపి ప్రభుత్వమేనని చెబుతూ ఆ తర్వాత భూసేకరణ ఇబ్బందుల్లేకుండా కొత్త ప్రాజెక్టులు చేపడతామని భరోసా వ్యక్తం చేశారు.
