తనది రైతు కుటుంబం అని, వ్యవసాయం తన వృత్తి అని నిత్యం చెప్పుకునే ముఖ్యమంత్రి చంద్రశేఖర్ రావు తన పేరు మీద సెంటు భూమి లేదని అఫిడవిట్‌లో ప్రస్తావించారు. కేసీఆర్, ఆయన సతీమని శోభమ్మ పేర్ల మీద ప్రత్యేకంగా ఎలాంటి భూములు లేవని అఫిడవిట్‌లో పేర్కొన్నారు. ఉన్న భూమంతా కుటుంబ ఉమ్మడి ఆస్గాతి చూపించారు.
గజ్వేల్‌తో పాటు కామారెడ్డి అసెంబ్లీ నియోజకవర్గాల నుంచి ఆయన గురువారం రెండు చోట్ల నుండి నామినేషన్లు దాఖలు చేశారు. ఈ సందర్భంగా సమర్పించిన అఫిడవిట్ లలో తమ ఉమ్మడి కుటుంబానికి 62 ఎకరాల భూమి ఉండగా అందులో 53.30 ఎకరాల సాగుభూములు, 9.36 ఎకరాల వ్యవసాయేతర భూములు అని పేర్కొన్నారు.
కాగా, సొంతంగా కారు, బైక్‌ లేవని తెలిపారు. బదులుగా ట్రాక్టర్లు, హార్వెస్టర్లు, జేసీబీ తదితర వాహనాలు 14 ఉన్నాయని, వీటి విలువ రూ.1.16 కోట్లుగా పేర్కొన్నారు.
తనపై 9 కేసులు ఉండగా, అవ్వన్నీ తెలంగాణ ఉద్యమం సందర్భంగా జరిగిన ధర్నాలు, రాస్తారోకోలు, నిరసనల అంశంలో కేసులేనని తెలుస్తోంది. ప్రస్తుతం తన చేతిలో రూ. 2లక్షల 96వేల నగదు మాత్రమే ఉన్నట్లు కేసీఆర్ పేర్కొన్నారు. కేసీఆర్, ఆయన సతీమణి శోభమ్మ పేర్లపై బ్యాంక్‌లలో డిపాజిట్లు అయిన నగదు రూ. 17కోట్లకు పైగా ఉంది.
కేసీఆర్ పేరు మీద మొత్తం తొమ్మిది బ్యాంక్‌ అకౌంట్స్‌, శోభమ్మకు మూడు అకౌంట్స్‌ ఉన్నాయి. గడిచిన ఐదేళ్లలో బ్యాంకు డిపాజిట్లు రెట్టింపుకు పైగా పెరిగాయి. 2018 ఎన్నికల సమయంలో బ్యాంకుల్లో ఫిక్స్‌డ్‌ డిపాజిట్లు, సేవింగ్స్‌ కలిపి రూ.5.63 కోట్లు ఉన్నాయి. ఇప్పుడది మరో 11.16 కోట్లకు పెరిగింది.
సీఆర్‌ సతీమణి శోభ చేతిలో 2018 ఎన్నికల సమయంలో రూ.94 వేలు ఉంటే, ఇప్పుడు రూ.6.29 కోట్లకు చేరింది. బంగారు ఆభరణాలు 2.8 కేజీలు(రూ. 17లక్షలు విలువచేసే) ఉన్నట్లు తాజా అఫిడవిట్‌లో వెల్లడించారు . గత పదేళ్లుగా ప్రభుత్వానికి ఎలాంటి బకాయిలు లేవని కేసీఆర్ అఫిడేవిట్‌లో చూపించారు.
స్థిర ఆస్తుల రూపంలో రూ. 17.83 కోట్లు, చరాస్తుల రూపంలో రూ.9.67 కోట్లు ఉన్నాయి కేసీఆర్‌కు. ఆయన భార్య శోభ పేరు మీద రూ.7.78 కోట్ల విలువ చేసే చరాస్తులు ఉన్నాయి. ఉమ్మడి ఆస్తిగా రూ.9.81 కోట్ల మేర చరాస్తులు ఉన్నాయి. కేసీఆర్ పేరు మీద రూ.17.27 కోట్ల అప్పు, కుటుంబం పేరు మీద రూ.7.23 కోట్ల అప్పు ఉంది.
