ఎసిబి వలకు మరో అవినీతి తిమింగలం చి క్కింది. ఆదాయానికి మించిన అస్తులు కూడబెట్టారన్న ఆరోపణలపై హెచ్‌ఎండిఎ మాజీ డైరెక్టర్ శివబాలకృష్ణ ఇళ్లు, కార్యాలయల్లో అవినీతి నిరోధక శాఖ సోదాలు చేసింది. బుధవారం ఉదయం 5గంటల నుంచి బృందాలుగా విడిపోయి ఎసిబి అధికారులు జరిపిన సోదాలలో రూ 100 కోట్లకు పైగా అక్రమాస్తులు వెలుగులోకి రావడంతో అరెస్ట్ చేశారు.
శివబాలకృష్ణను ఏసీబీ కోర్టు ఫిబ్రవరి 8 వరకు జ్యుడీషియల్‌ రిమాండ్‌ విధించగా, ఏసీబీ అధికారులు చంచల్‌గూడ జైలుకు తరలించారు. ప్రస్తుతం ఆయన రియల్ ఎ స్టేట్ రెగ్యులేటరీ అథారిటీ (రెరా)కి కా ర్యదర్శిగానూ అదనపు బాధ్యతలు నిర్వహిస్తున్నారు. సోదాల్లో భాగంగా మాసబ్ ట్యాంక్‌లోని రెరా కార్యాలయం, అ మీర్‌పేటలోని హెచ్‌ఎండిఎ కార్యాల యం, మణికొండలోని నివాసం, బంధువులు ఇళ్లలో అవినీతి నిరోధక శాఖ, ఏకకాలంలో 20 చోట్ల 14 బృందాలతో దాడులు నిర్వహించింది.
అనేక రియల్ ఎస్టేట్ కంపెనీలకు ఇష్టానుసారం అనుమతులు జారీ చేసి అక్రమంగా కోట్ల రూపాయల ఆస్తులు కూడబెట్టారని ఇటీవల ఎసిబికి వచ్చిన సమాచారంతో అధికారులు సోదాలు నిర్వహించారు. కాగా ఇప్పటి వరకు రూ.100 కోట్లకు పైగా స్థిర, చర ఆస్తులు గుర్తించారు.
వాటిలో రూ.40 లక్షల నగదు, రెండు కిలోల బంగారు ఆభరణాలు, ఖరీదైన 60 చేతి గడియారాలు, ఆస్తి పత్రాలు, బ్యాంకు డిపాజిట్లు ఉన్నట్లు ధ్రువీకరించారు. అలానే 14 ఫోన్లు, 10 ల్యాప్‌టాప్‌లు మొదలగు ఎలక్ట్రానిక్ గాడ్జెట్స్ సైతం ఉన్నట్లు గుర్తించి, వాటిని స్వాధీనపరచుకున్నారు. బాలకృష్ణకు సంబంధించిన బ్యాంకు లాకర్లు, ఇతర ఆస్తులపై ఎసిబి దర్యాప్తు ముమ్మరం చేసింది. అందులో భాగంగానే గురువారం కూడా సోదాలు కొనసాగించారు.
బాలకృష్ణకు సంబంధించిన బ్యాంకు లాకర్లు, ఇతర ఆస్తులపై ఎసిబి దర్యాప్తు ముమ్మరం చేసింది. ప్రస్తుతం శివబాలకృష్ణ ఉంటున్న విల్లా విలువే యాభై కోట్ల పైబడి ఉంటుందని అంచనా వేస్తున్నారు. బ్యాంక్ లాకర్ల వివరాలు తెలిస్తే మరిన్ని ఆస్తులు ఈ తనిఖీల్లో బయటపడే అవకాశముందని స్పష్టమవుతోంది. ఎసిబి దాడుల్లో ఇటీవల కాలంలో ఇంత పెద్ద మొత్తంలో ఆస్తులు బయటపడటం ఇదే తొలిసారి అని అధికారులు వెల్లడించారు.
కాంగ్రెస్ ప్రభుత్వం వచ్చిన తరువాత అవినీతికి పాల్పడ్డ అధికారులపై దాడులు పెరిగాయి. దీనికి తోడు ఎసిబి డైరెక్టర్‌గా సివి ఆనంద్ నియామకం కావడం కూడా ఈ శాఖ పని జోరందుకుంది. తాజా దాడులు ఇతర అవినీతికి పాల్పడ్డ అధికారుల్లో గుబులు రేపుతున్నాయి. రాజకీయ ఒత్తిడికి తలొగ్గి తీసుకున్న నిర్ణయాలు, అవినీతి వ్యవహారాలు ఇప్పుడు తమ తలకు చుట్టుకున్నట్లు ఆందోళన చెందుతున్నారు.
