సానియా మీర్జా టెన్నిస్ పోటీలకు ఇక దూరం

భారతదేశపు అత్యంత విజయవంతమైన మహిళా టెన్నిస్ క్రీడాకారిణి సానియా మీర్జా ఇక క్రీడా పోటీల నుండి విరమించుకొంటున్నట్లు సంచలన ప్రకటన చేశారు. ప్రస్తుతం ఆస్ట్రేలియా ఓపెన్ 2022 తొలి రౌండ్ లో ఓటమి అనంతరం తన  టెన్నిస్ కెరీర్ కు ముగింపు పలుకుతున్నట్లు వెల్లడించారు.

 టెన్నిస్ ర్యాంకింగ్స్ లో 68వ స్థానంలో ఉన్న సానియా మీర్జా  సింగిల్స్ విభాగంలో 27వ ర్యాంకులో సత్తా చాటుతోంది. 2016లో జరిగిన ఆస్ట్రేలియా ఓపెన్ లో మార్టినా హింగిస్ తో కలిసి టైటిల్ సాదించింది. 

భారత్ తరపున తొలి గ్రాండ్ స్లామ్ అందుకున్న భారతీయురాలిగా చరిత్ర సృష్టించి ఎన్నో విజయాలతో భారత టెన్నిస్ కు ప్రత్యేక గుర్తింపు తీసుకొచ్చిన హైదరాబాదీ సానియా మీర్జా కెరీర్ మంచి పీక్స్ లో ఉన్న సమయంలోనే పాక్ క్రికెటర్ షోయబ్ మాలిక్ ను వివాహం చేసుకుంది. 

పెళ్లి చేసుకుని షోయబ్ మాలిక్ తో వైవాహిక జీవితం గడుపుతున్నప్పటికీ టెన్నిస్ రాకెట్ విడిచిపెట్టలేదు. పిల్లాడిని కన్న తర్వాత కూడా టెన్నిస్ రాకెట్ పై మమకారంతో అడపా,  దడపా టెన్నిస్ టోర్నీల్లో ఆడుతూనే ఉన్నారు. అయితే గత రెండేళ్లుగా కరోనా విజృంభించిన సమయం నుంచి అంతర్జాతీయ టోర్నీలు పెద్దగా లేకపోవడంతో  సానియా టెన్నిస్ టోర్నీల్లో పాల్గొనలేదు. 

ప్రస్తుతం ఆస్ట్రేలియా ఓపెన్ 2022లో నదియా కిచెనాక్ తో కలసి బరిలోకి దిగిన సానియా తొలి రౌండ్ ఓటమితో నిరాశ చెందినట్లు కనిపించినా “నాకు తెలుసు.. ఇదే నా చివరి టోర్నీ అవుతుందని అనుకుంటూనే వచ్చా.. మ్యాచ్ లో ఓడిపోయానని కాదు కానీ.. నా రెండేళ్ల బాబును వెంట పెట్టుకుని టోర్నీల కోసం దేశాలు తిరగాల్సి రావడం.. శారీరకంగా.. మానసికంగా ఇబ్బందికరంగా ఉంది.. మునుపటి ఫామ్ కొనసాగించలేకపోతున్నానని అర్థమవుతోంది.. అందుకే కెరీర్ కు గుడ్ బై చెప్పాలని నిర్ణయించుకున్నాను” అని సానియా మీర్జా వెల్లడించింది.   

మహిళల డబుల్స్‌లో ఆమె నంబర్‌వన్‌ ర్యాంక్‌కు చేరుకుంది.కెరీర్‌లో ఆరు గ్రాండ్‌స్లామ్‌ టైటిల్స్‌ సాధించింది. వీటిలో మూడు టైటిల్స్ మహిళల డబుల్స్‌, మూడు మిక్స్‌డ్ డబుల్స్‌లో గెలుచుకుంది. 2009లో ఆస్ట్రేలియన్ ఓపెన్ మిక్స్‌డ్ డబుల్స్‌లో, 2012లో ఫ్రెంచ్ ఓపెన్, 2014లో యూఎస్ ఓపెన్. మహిళల డబుల్స్‌లో 2015లో వింబుల్డన్, యూఎస్ ఓపెన్, 2016లో ఆస్ట్రేలియన్ ఓపెన్‌లో ట్రోఫీలు సాధించింది. 2013లో సానియా సింగిల్స్ ఆడటం మానేసింది. అప్పటి నుంచి ఆమె డబుల్స్‌లో మాత్రమే ఆడుతోంది. సింగిల్స్‌లో ఆడుతున్నప్పుడు కూడా సానియా చాలా విజయాలు సాధించింది. చాలా మంది పెద్ద టెన్నిస్ క్రీడాకారులను ఆమె ఓడించి 27వ ర్యాంక్‌కు చేరుకుంది.