నాటో సైనిక కూటమిలో చేరేందుకు ఫిన్లాండ్‌, స్వీడన్‌లు తీసుకున్న నిర్ణయాలపై రష్యా ఆగ్రహం వ్యక్తం చేసింది. ఈ నిర్ణయం మరో తీవ్ర తప్పిదమని, దీనిపై తప్పనిసరిగా చర్యలు తీసుకుంటామని హెచ్చరించింది. ”ఇది, సుదీర్ఘకాలంలో తీవ్ర పర్యవసానాలు కలిగించగల మరో ఘోరమైన తప్పిదం” అని రష్యా ఉప విదేశాంగ మంత్రి సెర్గీ రిబకోవ్‌ స్పష్టం చేశారు.
దీని వల్లనా సైనిక ఉద్రిక్తతల స్థాయి పెరుగుతుందని ఆమె హెచ్చరించారు. ప్రస్తుత పరిస్థితుల్లో ఏం చేయాలనే ఆలోచనలు సరిగా లేకపోవడం విచారకరమని తెలిపారు. ఇటువంటి నిర్ణయాలతో ఇరుదేశాల భద్రత పటిష్టం కాబోదని పేర్కొన్నారు. ఈ విషయాన్ని ఇక్కడితో విడిచి పెడతామని భావించరాదని, మాస్కో తగిన రీతిలో చర్యలు తీసుకుంటుందని రిబకోవ్‌ స్పష్టం చేశారు.
తప్పనిసరిగా ప్రతీకార చర్యలు తీసుకుంటామని మాస్కో ఫిన్లాండ్‌ను హెచ్చరించింది. శనివారం ఫిన్లాండ్‌ ప్రధాని సాలి నితినిస్తో రష్యా అధినేత పుతిన్‌తో మాట్లాడారు. ఈ నిర్ణయంతో ముందుకు సాగడం తప్పు కాగలదని పుతిన్‌ స్పష్టం చేసినట్లు క్రెమ్లిన్‌ తెలిపింది. నాటోలో చేరాలన్న ఉద్దేశాన్ని ఫిన్లాండ్‌ ఆదివారం ప్రకటించిన విషయం తెలిసిందే.
మరోవంక, తటస్థతకు స్వీడన్‌ స్వస్తి పలికింది. స్వీడన్‌ పాలక పార్టీ కూడా నాటోలో చేరికకు మద్దతు ఇస్తోంది. పొరుగున గల ఫిన్లాండ్‌తో చేతులు కలిపింది. నాటో సభ్యత్వం కోసం సోమవారం దరఖాస్తు చేసింది. నాటో కూటమిలో చేరాలన్న ఫిన్లాండ్‌ బాటలోనే తాము కూడా పయనిస్తామని స్వీడన్‌ ప్రధాని మగ్డలీనా అండర్సన్‌ ప్రకటించారు.
తద్వారా 200 ఏళ్లుగా అనుసరిస్త్ను తటస్థ వైఖరికి స్వీడన్‌ ముగింపు పలుకుతోంది. ఈ నిర్ణయాన్ని దేశ రక్షణ విధానంలో చరిత్రాత్మక మార్పుగా మగ్డలీనా అభివర్ణించారు. నాటో సభ్యత్వంతో లభించే భద్రతా గ్యారెంటీలు స్వీడన్‌కు అవసరమని ఆమె పేర్కొన్నారు. స్వీడన్‌ నిర్ణయాన్ని అమెరికా స్వాగతించింది. అయితే, నాటోలో చేరినా తమ దేశంలో అణ్వాయుధాలను, నాటో శాశ్వత బేస్‌లను అంగీకరించబోమని మగ్డలీనా స్పష్టం చేశారు.
