ఏపీలో రాష్ట్రవ్యాప్తంగా నిర్వహించిన స్థానిక సంస్థల ఉప ఎన్నికల్లో అధికార పార్టీవిజయభేరి మ్రోగించింది. వివిధ కారణాలతో ఖాళీగా ఉన్న మండల పరిషత్‌ అధ్యక్ష (ఎంపీపీ), ఉపాధ్యక్ష, కో– ఆప్షన్‌ సభ్యుల పదవులకు ఉప ఎన్నికలు జరగ్గా.. వైఎస్సార్‌సీపీ విజయాన్ని అందుకుంది. ఏడు మండలాల్లో ఎంపీపీ పదవుల్లో.. చిత్తూరు జిల్లా రామకుప్పం మినహా మిగిలిన ఆరు మండలాల్లో గెలుపొందింది.
అలాగే 11 మండలాల్లో ఉపాధ్యక్ష పదవులకు ఉప ఎన్నికలు నిర్వహించగా.. రామకుప్పం మినహా మిగిలిన 10 మండలాల్లో తొమ్మిది చోట్ల వైఎస్సార్‌సీపీ అభ్యర్థులు గెలుపొందారు. ఒకచోట మాత్రం స్వతంత్ర అభ్యర్ధి గెలిచారు.
రామకుప్పం మండలంలో ఎంపీటీసీ సభ్యులు ప్రత్యేక సమావేశానికి హాజరుకాలేదు. దీంతో అక్కడ ఎంపీపీ, ఉపాధ్యక్ష ఎన్నికలు రెండూ వాయిదా పడ్డాయి. ఆరు మండలాల్లో కో ఆప్షన్‌ సభ్యుల ఎన్నికలు నిర్వహించగా.. ఐదు చోట్ల వైఎస్సార్‌ సీపీ సానుభూతిపరులే కో ఆప్షన్‌ సభ్యులుగా ఎన్నికయ్యారు. చిత్తూరు జిల్లాలో కో ఆప్షన్‌ సభ్యుడి పదవికి ఎవరూ నామినేషన్‌ వేయకపోవడంతో వాయిదా పడింది.
రాష్ట్రవ్యాప్తంగా 29 గ్రామ పంచాయతీలకు సంబంధించి ఉప సర్పంచి ఎన్నికలు జరగ్గా.. మొత్తం 25 పంచాయతీల్లో ఉప సర్పంచి ఎన్నికలు జరిగాయి. మూడు చోట్ల సభ్యులు హాజరు కాకపోవడంతో వాయిదా పడింది. ఒక్క చోట మాత్రం నిబంధనల శనివారం నిర్వహిస్తున్నారు.
మరోవైపు పల్నాడు జిల్లా దాచేపల్లి నగర పంచాయతీ ఛైర్మన్ పదవికి ఎన్నిక జరిగింది. ఈ ఉప ఎన్నికలో 10వ వార్డు నుంచి గెలుపొందిన వైఎస్సార్‌సీపీ సభ్యురాలు కె.సుబ్బమ్మ మున్సిపల్‌ చైర్మన్‌గా ఎన్నికయ్యారు. నగర పంచాయతీలో మొత్తం 20 వార్డులు ఉన్నాయి.. ఎన్నికల్లో 11 వార్డులు వైఎస్సార్‌సీపీ గెలుచుకుంది. ఏడు వార్డుల్లో తెలుగుదేశం పార్టీ, ఒక వార్డు జనసేన పార్టీ, ఒక వార్డు స్వతంత్ర అభ్యర్థి విజయం సాధించారు.
అయితే ముందు దాచేపల్లి నగర పంచాయతీ చైర్మన్ పదవిని దక్కించుకున్న మూడో వార్డు కౌన్సిలర్ మునగ రమాదేవి.. గతేడాది నవంబర్ నెలలో అనారోగ్యంతో పదవికి రాజీనామా చేయగా.. అనంతరం చనిపోయారు. దీంతో ఇంఛార్జ్ ఛైర్మన్‌గా మస్తాన్ బీని నియమించారు.
ఆ తర్వాత ఎన్నికల కమిషన్ ఛైర్మన్ పదవికి నోటిఫికేషన్ విడుదల చేసింది. కొత్త ఛైర్మన్‌ను ఎన్నుకున్నారు. గతంలోనే స్థానిక సంస్థల ఎన్నికలు నిర్వహించారు.. కానీ కొన్ని కారణాలతో కొన్ని పదవులు ఖాళీగా ఉన్నాయి.. ఇప్పుడు ఎన్నికల కమిషన్ నోటిఫికేషన్ జారీ చేయగా.. ఎన్నికలు జరిగాయి.
