తీరిక లేకుండా ఆఫీస్ పనిచేస్తూ గడిపే కార్పొరేట్ ఉద్యోగులకు విధినిర్వహణలో ఉండగానే తమ తమ ఆఫీస్ లలోనే మద్యం సేవించే సౌలభ్యాన్ని హర్యానా ప్రభుత్వం కలిగించింది. ఈ మేరకు 2023 – 2024 మద్యం పాలసీలో మార్పులు తీసుకువచ్చింది. ఈ నిర్ణయానికి మే 9న హర్యానా మంత్రివర్గం ఆమోద ముద్ర వేసింది.
అయితే, తక్కువ ఆల్కహాల్ ఉండే మద్యాన్ని మాత్రమే తాగాలని షరతు విధించింది. ఆల్కహాల్ తక్కువగా ఉండే బీర్లు, వైన్లు, మరికొన్ని పానీయాలను పెద్ద పెద్ద కార్పొరేట్ ఆఫీసుల్లోకి అనుమతి ఇస్తూ నిర్ణయం తీసుకుంది.
తోటి ఉద్యోగులతో కలిసి మద్యం సేవించవచ్చని చెప్పింది. 5 వేల మందికిపైగా ఉద్యోగులు ఉండి, లక్ష చదరపు అడుగుల విస్తీర్ణం ఉన్న ఆఫీసులకు మాత్రమే ఇది వర్తిస్తుందని తెలిపింది. జూన్ 12 నుంచి ఈ నిబంధన అమల్లోకి వస్తుందని హర్యానా సర్కార్ తెలిపింది. ఈ అనుమతి కోసం కార్పొరేట్ సంస్థలకు ఎల్-10 ఎఫ్ అనే ప్రత్యేక లైసెన్స్ను జారీ చేయనుంది.
ఈ లైసెన్స్ పొందాలంటే కార్పొరేట్ సంస్థలు ఏడాదికి రూ. 10 లక్షలు చెల్లించాలని పాలసీలో పేర్కొంది. దీనితోపాటు మరో రూ. 3 లక్షలు సెక్యూరిటీ మొత్తంగా చెల్లించాలని తెలిపింది. కలెక్టర్, ఎక్సైజ్, ఐటీ కమిషనర్ల అనుమతితో లైసెన్స్ మంజూరు చేస్తారని చెప్పింది.