జమ్ముకాశ్మీర్లోని కుల్గాం జిల్లాలో ఆదివారం జరిగిన రెండు వేర్వేరు ఎన్కౌంటర్లలో ఇద్దరు భద్రతా సిబ్బంది, ఆరుగురు ఉగ్రవాదులు మరణించారు. అలాగే రాజౌరిలో జరిగిన ఉగ్రదాడిలో ఒక జవాన్ తీవ్రంగా గాయపడ్డారు. ఆరుగుర్ని చంపడం ఉగ్రవాదుల ఏరివేతలో ప్రధానమైన ముందడుగుగా జమ్ముకాశ్మీర్ డిజిపి ఆర్ఆర్ స్వైన్ పేర్కొన్నారు.
కాగా, రాజౌరి జిల్లాలో జరిగిన ఎన్ కౌంటర్లో జమ్ము కశ్మీర్లో ఇటీవల పెరిగిన ఉగ్రవాద కార్యకలాపాల వెనుక లష్కరే తోయిబాకు చెందిన రెసిస్టెన్స్ ఫ్రంట్ ఉన్నట్టు భద్రతా దళాలు భావిస్తున్నాయి. కుల్గాంలోని చినిగాం, మోటర్గామ్ ప్రాంతాల్లో ఉగ్రవాదులు ఉన్నారనే సమాచారం అందడంతో శనివారం నుంచి . పోలీసులు, సైన్యం సంయుక్తంగా గాలింపు చర్యలు చేపట్టాయని అన్నారు.
తనిఖీలు చేస్తున్న భద్రతా సిబ్బందిపై ఉగ్రవాదులు ఒక్కసారిగా కాల్పులు జరపడంతో సిబ్బంది కూడా ఎదురు కాల్పులు జరిపారని డిజిపి తెలిపారు. చినిగాంలో ఒకరు, మోటర్గామ్లో ఒకరు మొత్తం ఇద్దరు సైనికులు ఎన్కౌంటర్లలో మృతి చెందినట్లు చెప్పారు. చనిపోయిన జవాన్లను లాన్స్ నాయక్ పర్దీప్ కుమార్, సిపాయి ప్రవీణ్ జంజల్ ప్రభాకర్గా గుర్తించారు. రాజౌరిలోని ఆర్మీ పోస్ట్పై ఆదివారం ఉగ్రవాదులు జరిపిన దాడిలో ఒక సైనికుడు తీవ్రంగా గాయపడ్డారు.
మంజాకోట్ ప్రాంతంలోని గలుతిలో ఉన్న ఆర్మీ క్యాంప్పై ఆదివారం తెల్లవారు జామున 4 గంటల ప్రాంతంలో ఈ దాడి జరిగిందని అధికారులు తెలిపారు. సైనికులు కూడా ప్రతిగా కాల్పులు జరిపారని, ఉగ్రవాదులు అరగంట పాటు కాల్పులు జరిపి అక్కడ నుంచి పారిపోయారని చెప్పారు. గాలింపు చర్యలు ముమ్మరం చేసినట్లు ఆయన తెలిపారు.