కేంద్రంలో అధికారంలో ఉన్న నేషనల్ డెమోక్రటిక్ అలయన్స్-ఎన్డీఏ నుండి నిష్క్రమిస్తున్నట్లు ఆల్ ఇండియా అన్నా ద్రవిడ మున్నేట్ర కజగం-అన్నాడీఎంకే వెల్లడించింది. ఈ మేరకు పార్టీ సమావేశంలో అన్నాడీఎంకే ఎంపీలు, ఎమ్మెల్యేలు, మిగిలిన నేతలంతా ఏకగ్రీవంగా తీర్మానాన్ని ఆమోదించారని ఆ పార్టీ డిప్యూటీ జనరల్ సెక్రటరీ, తమిళనాడు మాజీ మంత్రి కేపీ మునుస్వామి ప్రకటించారు.
తమిళనాడులోని పార్టీ ప్రధాన కార్యాలయంలో సోమవారం జరిగిన సమావేశం తర్వాత అన్నాడీఎంకే బీజేపీతో పొత్తును తెంచుకున్నట్లు వెల్లడించారు. వచ్చే ఎన్నికల్లో బీజేపీ లేకుండానే ఒంటరిగా బరిలోకి దిగనున్నట్లు అన్నాడీఎంకే స్పష్టం చేసింది. గత కొన్ని రోజుల నుంచి అన్నాడీఎంకే, బీజేపీ నేతలు బహిరంగంగానే ఒకరిపై మరొకరు తీవ్ర విమర్శలు గుప్పించుకుంటున్నారు.
దీంతో ఎన్డీఏ నుంచి అన్నాడీఎంకే బయటికి వస్తుందని రాజకీయ వర్గాల్లో తీవ్ర చర్చ జరిగింది. తమ పార్టీని, పార్టీ నాయకులను నిరంతరం అవమానిస్తున్న బీజేపీతో పొత్తు ఉండబోదని ఇప్పటికే చాలామంది అన్నాడీఎంకే నేతలు బహిరంగంగానే ప్రకటించగా, అధికారికంగా మాత్రం సోమవారం ప్రకటించారు. ఈ సందర్భంగా పార్టీ ఆఫీస్ ముందు అన్నాడీఎంకే నేతలు బాణసంచా కాల్చి సంబరాలు చేసుకున్నారు.
తమిళనాడు మాజీ సీఎంలు అన్నాదురై, జయలలితలపై తమిళనాడు బీజేపీ అధ్యక్షుడు అన్నామలై ఇటీవల చేసిన వ్యాఖ్యలు బీజేపీ, అన్నాడీఎంకే పార్టీల మధ్య వివాదానికి కారణమయ్యాయి. అప్పటి నుంచి ఇరు పార్టీలకు చెందిన నేతలు తీవ్ర విమర్శలు గుప్పించుకుంటూనే ఉన్నారు.
1956 లో మధురైలో జరిగిన ఓ కార్యక్రమంలో హిందూ మతాన్ని అన్నాదురై అవమానించారని అన్నామలై ఆరోపించారు. ఆ తర్వాత అన్నాదురైని మధురైలో దాచి ఉంచారని, క్షమాపణలు చెప్పిన తర్వాత ఆయన తప్పించుకున్నారని తెలిపారు. ఇదే ఈ రెండు పార్టీల మధ్య తీవ్ర మాటల యుద్ధానికి దారితీసింది.
ఆ తర్వాత తమిళనాడు మాజీ సీఎం జయలలితపైనా అన్నామలై తీవ్ర అవినీతి ఆరోపణలు చేశారు. అన్నాడీఎంకే అధికారంలో ఉన్నపుడు జరిగిన అవినీతి జాబితాను విడుదల చేస్తానని అనడంతో ఆ పార్టీ నేతల నుంచి తీవ్ర విమర్శలు వెల్లువెత్తాయి. కూటమిలో ఉన్న పార్టీ పట్ల బీజేపీ ఈ విధంగా వ్యవహరించడం సరికాదని మండిపడ్డారు.
మాజీ మంత్రి డి.జయకుమార్‌ అన్నామలై వ్యాఖ్యలపై తీవ్ర వ్యతిరేకత వ్యక్తం చేయడం, ఢిల్లీలో బీజేపీ అగ్రనాయకులను అన్నాడీఎంకే నేతలు కలిసి అన్నామలై వ్యాఖ్యలను ప్రస్తావించడం చేశారు. అయినప్పటికీ అన్నామలై విషయంలో బీజేపీ ఎలాంటి చర్యలు తీసుకోకపోవడంతో కూటమి నుంచి వైదొలగాలని నిర్ణయించుకున్నట్లు పార్టీ వర్గాల్లో చర్చ జరుగుతోంది. మరోవంక, బీజేపీతో పొత్తు పెట్టుకోవడం వల్లే గత తమిళనాడు అసెంబ్లీ ఎన్నికల్లో అన్నాడీఎంకే ఘోరంగా ఓడిపోయిందన్న అభిప్రాయాలు కూడా ఆ పార్టీ నేతల్లో వ్యక్తం అయ్యాయి.
