ఢిల్లీ లిక్కర్ స్కాంలో ఆమ్ ఆద్మీ పార్టీ ఎంపీ సంజయ్ సింగ్ నివాసంలో బుధవారం ఉదయం నుంచి తనిఖీలు జరిపిన ఎన్ఫోర్స్మెంట్ డైరెక్టరేట్ అధికారులు తర్వాత ఆయనను అరెస్ట్ చేశారు. ఢిల్లీ లిక్కర్ పాలసీ కేసుతో పాటు దానితో ముడిపడి ఉన్న మనీ లాండరింగ్ కేసులో కావాల్సిన ఆధారాల కోసం ఈడీ అధికారులు విస్తృత తనిఖీలు నిర్వహించారు.
తెల్లవారుజామున ఎంపీ సంజయ్ సింగ్ ఇంట్లోకి వెళ్లిన ఈడీ అధికారులు.. సుదీర్ఘ సోదాలు నిర్వహించారు. అనంతరం సాయంత్రం ఎంపీని అరెస్ట్ చేశారు. అయితే ఢిల్లీ లిక్కర్ కేసులో తనను కూడా ఈడీ అధికారులు విచారణ జరుపుతారని గతంలోనే వెల్లడించిన ఎంపీ సంజయ్ సింగ్ తన ఇంటి ముందు వెల్కమ్ ఈడీ అంటూ పోస్టర్ కూడా పెట్టడం గమనార్హం.
ఈ కేసులో నిందితుడైన వ్యాపారవేత్త దినేష్ అరోరా అప్రూవర్గా మారిన తర్వాత సంజయ్ సింగ్ నివాసంపై ఈడి దాడులు నిర్వహించడం గమనార్హం. ఆప్ నేత తనను ఎక్సైజ్ మంత్రిగా ఉన్న మనీష్ సిసోడియాకు పరిచయం చేశారని అరోరా పేర్కొన్నట్లు ఈడి తెలిపింది.
మరోవైపు ఈ కేసులో ఢిల్లీ మాజీ మంత్రి, ఆప్ నేత మనీశ్ సిసోడియా ప్రస్తుతం జైలులోనే ఉన్నారు. ఫిబ్రవరిలో మనీశ్ సిసోడియాను సీబీఐ అరెస్ట్ చేయగా, ఆయన పలుమార్లు తనకు బెయిల్ ఇవ్వాలని కోరినా న్యాయస్థానాలు ఆ అప్పీళ్లను తిరస్కరించాయి. దీంతో ఆయన దాదాపు 8 నెలలుగా జైలులోనే ఉంటున్నారు.
ఆప్ పార్టీకి సంబంధించి తాజాగా మూడో కీలక నేత అరెస్ట్ కావడం గమనార్హం. నాలుగు కంపెనీల ద్వారా మనీలాండరింగ్ చేశారనే ఆరోపణలపై ఢిల్లీ మాజీ ఆరోగ్య మంత్రి సత్యేందర్జైన్ను గతేడాది మేలో అరెస్ట్ చేశారు. అనంతరం ఈఏడాది ఫిబ్రవరిలో కేజ్రీవాల్ సన్నిహితుడు, ఢిల్లీ డిప్యూటీ సిఎం మనీష్ సిసోడియాను సిబిఐ అదుపులోకి తీసుకుంది. ఈ కేసులో ఇప్పటికే ఢిల్లీ సీఎం, ఆమ్ ఆద్మీ పార్టీ నేషనల్ కన్వీనర్ అర్వింద్ కేజ్రీవాల్ను ఈ ఏడాది ఏప్రిల్లో 9 గంటల పాటు ఈడీ అధికారులు ప్రశ్నించారు.
2021లో ఢిల్లీ ప్రభుత్వం ఆ రాష్ట్రంలో మద్యం విక్రయాలకు సంబంధించిన ఒక పాలసీని ప్రవేశపెట్టింది. అందులో అవకతవకలు ఉన్నాయని ఢిల్లీ లెఫ్టినెంట్ గవర్నర్ వీకే సక్సేనా ఇచ్చిన ఫిర్యాదుతో సీబీఐ, ఈడీ రంగంలోకి దిగాయి. అప్పటి నుంచి ఈ కేసుకు సంబంధం ఉన్న వారిని విచారణ జరపడం, అరెస్ట్ చేయడం వంటి ఘటనలు జరుగుతూనే ఉన్నాయి.