సుదీర్ఘకాలం కాంగ్రెస్ లో కీలక పదవులలో ఉన్న మహారాష్ట్ర మాజీ ముఖ్యమంత్రి అశోక్ చవాన్ బీజేపీలో చేరిన రెండు రోజులకే రాజ్యసభ సీటు దక్కింది. తాజాగా రాజ్యసభకు అభ్యర్థులను ఎంపిక చేసే క్రమంలో మహారాష్ట్ర నుంచి అశోక్ చవాన్ పోటీ చేయనున్నట్లు బిజెపి ప్రకటించింది.
ఇక బీజేపీ జాతీయ అధ్యక్షుడు జేపీ నడ్డా కూడా మరోసారి రాజ్యసభ సీటును దక్కించుకున్నారు. ఈసారి జేపీ నడ్డాను గుజరాత్ నుంచి బీజేపీ ఎంపిక చేసింది. తాజాగా బీజేపీ విడుదల చేసిన జాబితాలో మహారాష్ట్ర నుంచి అశోక్‌చవాన్, గుజరాత్ నుంచి జేపీ నడ్డా పేర్లను ప్రకటించింది. రాజ్యసభ ఎన్నికల్లో పోటీ చేసే వారికి నామినేషన్ల గడువు గురువారంతో ముగియనుంది.
ఈ క్రమంలోనే అన్ని పార్టీలు తమ పార్టీ తరఫున రాజ్యసభకు బరిలో ఉండే అభ్యర్థుల పేర్లను ప్రకటిస్తున్నాయి. మధ్యప్రదేశ్ నుంచి డాక్టర్ ఎల్.మురుగన్, ఉమేష్ నాథ్ మహరాజ్, మాయా నరోలియా, బన్సీలాల్ గుర్జర్‌ల పేర్లను అభ్యర్థులుగా బీజేపీ ప్రకటించింది. ఒడిశా నుంచి కేంద్రమంత్రి అశ్విని వైష్ణవ్‌ను రంగంలోకి దించింది.
ఇక రాజస్థాన్ నుంచి చున్నిలాల్ గరాసియా, మదన్ రాథోడ్‌లను రాజ్యసభ సభ్యులుగా సోమవారం బీజేపీ రంగంలోకి దించింది. రాజస్థాన్‌కు చెందిన ఇద్దరు రాజ్యసభ సభ్యుల పదవీకాలం త్వరలో ముగియనుంది.
కాంగ్రెస్ పార్టీ నుంచి మాజీ ప్రధాని మన్మోహన్ సింగ్, బీజేపీ నుంచి భూపేందర్ యాదవ్ రాజ్యసభ సభ్యులుగా ఉండగా, వారి పదవీకాలం ఏప్రిల్ 3 వ తేదీతో ముగియనుంది. 15 రాష్ట్రాల్లోని 56 రాజ్యసభ స్థానాలకు ఈ నెల 27 వ తేదీన జరగనుండగా అదే రోజు ఓట్ల లెక్కింపు నిర్వహించనున్నారు.
ఇలా ఉండగా, కాంగ్రెస్ అగ్రనేత సోనియా గాంధీ మొదటిసారి రాజ్యసభ ఎన్నికలలో పోటీ చేస్తున్నారు. రాజస్థాన్ నుండి ఆమె బుధవారం నామినేషన్ వేశారు. లోక్ సభలో ఆమె ప్రాతినిధ్యం వహిస్తున్న రాయబరేలి నుండి ఆమె కుమార్తె ప్రియాంక గాంధీ పోటీ చేయవచ్చని భావిస్తున్నారు.
ఇక హిమాచల్ ప్రదేశ్ నుంచి అభిషేక్ మను సింఘ్వీ, మహారాష్ట్రం నుంచి చంద్రకాంత్ హాండోర్‌ నామినేషన్ దాఖలు చేయనున్నారని వెల్లడించింది తెలంగాణ నుంచి ఇద్దరు కాంగ్రెస్ నేతలను రాజ్యసభకు పంపాలని పార్టీ అధిష్ఠానం నిర్ణయించింది. సీనియర్ నాయకురాలు, మాజీ ఎంపీ రేణుక చౌదరిని, యువ నేత అనిల్ కుమార్ యాదవ్ ను రాజ్యసభకు కాంగ్రెస్ పార్టీ ఎంపిక చేసింది.
అనిల్ ప్రస్తుతం సికింద్రాబాద్ డిసిసి అధ్యక్షుడిగా వ్యవహరిస్తున్నారు. కర్ణాటక నుంచి అజయ్ మాకెన్, చంద్రశేఖర్, హుస్సేన్ లను, మధ్యప్రదేశ్ నుంచి అశోక్ సింగ్ ను పార్టీ అధిష్ఠానం ఎంపిక చేసింది. ఈ మేరకు అభ్యర్థులు గురువారం తమ నామినేషన్లు దాఖలు చేస్తారు.
