ఉత్తర్ ప్రదేశ్లోని హత్రాస్లో తొక్కిసలాట ఘటనకు కారకుడైన జగత్ గురు సకారి విశ్వహరి అలియాస్ భోలే బాబా ఆచూకీ ఇంకా తెలియరాలేదు. గత మంగళవారం సత్సంగ్ పేరుతో ఆయన నిర్వహించిన సమావేశంలో ఆయన పాదధూళి కోసం జనం ప్రయత్నించడం తొక్కిసలాటకు దారితీసి 123 మంది ప్రాణాలు కోల్పోయిన విషయం తెలిసిందే. ఈ దుర్ఘటన యావత్తు దేశాన్ని తీవ్ర దిగ్భ్రాంతికి గురిచేసింది. అప్పటి నుంచి పరారీలో ఉన్న భోలే బాబా కోసం పోలీసులు వెదుకుతున్నారు.
కానీ, ఆయన మాత్రం ఘటన జరిగిన మూడు రోజుల తర్వాత మీడియాకు ఓ వీడియోను విడుదల చేయగా.. ఇప్పుడు అది వైరల్ అవుతోంది. ‘తొక్కిసలాట ఘటన చాలా విచారకరం… ఈ బాధను తట్టుకునే శక్తిని భగవంతుడు ప్రసాదిస్తాడు. దయచేసి ప్రభుత్వం, అధికార యంత్రాంగంపై నమ్మకం ఉంచండి. గందరగోళం సృష్టించిన వారు ఎవరైనా విడిచిపెట్టరని నాకు నమ్మకం ఉంది. మృతుల కుటుంబాలకు, గాయపడిన వారికి అండగా నిలవాలని, జీవితాంతం వారికి సహాయం చేయాలని కమిటీ సభ్యులను నేను నా లాయర్ ఏపీ సింగ్ ద్వారా అభ్యర్థించాను’’ అని ఆయన వీడియోను విడుదల చేశారు.
హత్రాస్ జిల్లాలో మంగళవారం భోలే బాబా నిర్వహించిన సత్సంగ్కు రెండున్నర లక్షల మంది భక్తులు హాజరయ్యారు. ఆయన ప్రసంగం తర్వాత వేదికను వీడి కారును ఎక్కుతుండగా.. బాబా పాదధూళి కోసం భక్తులు ఎగబడ్డారు. దీంతో తోపులాట జరిగి ఒకరిపై ఒకరు పడి తొక్కిసలాటకు దారితీసింది. మహిళలు, చిన్నారులు ఊపిరాడక ఉక్కిరిబిక్కిరయి ప్రాణాలు కోల్పోయారు. అయితే, సత్సంగ్కు 80 వేల మంది హాజరవుతారని నిర్వాహకులు అనుమతి తీసుకున్నారని పోలీసులు వెల్లడించారు.
ఘటన తర్వాత పరారీలో ఉన్న భోలే బాబాను ఎఫ్ఐఆర్లో నిందితుడిగా పేర్కొనకపోవడం గమనార్హం. అతడి తరఫున లాయర్ శుక్రవారం మీడియాతో మాట్లాడుతూ.. విచారణకు బాబా సహకరిస్తారని అన్నారు. ‘జిల్లాలవారిగా బాధితుల జాబితాను సేకరించాం.. మృతుల కుటుంబాల్లోని పిల్లల విద్య, ఆరోగ్యం, వివాహం సహా మొత్తం నారాయణ్ సకార్ హరి ట్రస్ట్ బాధ్యత తీసుకుంటుంది’ అని సింగ్ తెలిపారు.
కాగా, ఈ కేసులో ప్రధాన నిందితుడిగా పేర్కొన్న సత్సంగ్ ముఖ్య సేవాదార్ దేవప్రకాశ్ మధుకర్ను ఢిల్లీలో అరెస్ట్ చేశారు. దీంతో తొక్కిసలాట ఘటనలో ఇప్పటివరకు ఏడుగుర్ని అరెస్ట్ చేసినట్టు హత్రాస్ పోలీసులు వెల్లడించారు. అయితే, మధుకర్ తరఫున కూడా లాయర్గా హాజరైన ఏపీ సింగ్.. తన క్లయింట్ పోలీసులకు లొంగిపోయాడని చెప్పడం గమనార్హం. తాము ఎటువంటి నేరం చేయలేదని, ముందస్తు బెయిల్కు అందుకే దరఖాస్తు చేయలేదని అన్నారు.