డిజిటల్ చెల్లింపులు గణనీయంగా పెరుగుతున్నా బ్యాంకు ఖాతాదారులు ఏటీఎం లను వినియోగించడం సహితం తగ్గడం లేదు. దానితో ఇటీవల కాలంలో ఏటీఎంల సేవల వినియోగంపై బ్యాంకులు వసూలు చేస్తున్న ఫీజులను పెంచేసాయి.
దాదాపు ప్రతి బ్యాంకు సహితం తమ బ్యాంకులకు చెందిన ఏటీఎంలలో ప్రతి నెల ఐదు లావాదేవీల వరకు ఉచితంగానే సేవలు అందిస్తున్నాయి. అదే, ఇతర బ్యాంకుల ఏటీఎంలను ఉపయోగించుకొంటే మూడు లావాదేవీలను ఉచితంగా పొందవచ్చు. ఆ పైన జరిపే లావాదేవీలకు ఫీజులు చెల్లింపవలసి ఉంటుంది. ఆయా ఖాతాలను బట్టి ఏటీఎం చార్జీలు ఉంటాయి.
భారతీయ స్టేట్ బ్యాంక్ (ఎస్బీఐ) ప్రతి రీజియన్ పరిధిలో ఒక నెలలో ఐదు ఉచిత విత్డ్రాయల్స్ ఫెసిలిటీ కల్పిస్తున్నది. ముంబై, న్యూఢిల్లీ, చెన్నై, కోల్కతా, బెంగళూరు, హైదరాబాద్ వంటి మెట్రో నగరాల పరిధిలో ఇతర బ్యాంకుల ఏటీఎంల్లో ప్రతి నెలా మూడు లావాదేవీలను ఉచితంగా చేసుకోవచ్చు.
ఒక నెలలో సొంత ఏటీఎంల్లో ఐదు కంటే ఎక్కువ లావాదేవీలు జరిగినా, ఇతర బ్యాంకుల ఏటీఎంల్లో మూడు కంటే ఎక్కువ జరిపినా ఫీజు వసూలు చేస్తుంది ఎస్బీఐ. సొంత ఏటీఎంల్లో ఐదు లావాదేవీలు దాటాక ప్రతి ట్రాన్సాక్షన్పై రూ.10, ఇతర బ్యాంకుల ఏటీఎంల్లో పరిమితి తర్వాత జరిపే ప్రతి విత్ డ్రాయల్పైనా రూ.20 వసూలు చేస్తుంది. సొంత ఏటీఎంల్లో ఆర్థికేతర లావాదేవీపై రూ.5, ఇతర బ్యాంకుల ఏటీఎంల్లో ఆర్థికేతర ట్రాన్సాక్షన్పై రూ.8 వసూలు చేస్తుంది.
హెచ్డీఎఫ్సీ బ్యాంక్ ప్రతి నెలా తన సొంత ఏటీఎంలో ఐదు లావాదేవీలు ఉచితంగా అందిస్తుంది. మెట్రో సిటీలలో ఇతర బ్యాంకుల ఏటీఎంల్లో మూడు, నాన్ మెట్రో సిటీల్లోని ఇతర బ్యాంకుల ఏటీఎంల్లో ఐదు లావాదేవీలు ఉచితంగా పొందొచ్చు. ఈ పరిధి దాటిన ప్రతి ట్రాన్సాక్షన్పై రూ.21తోపాటు అనుబంధ చార్జీలు, నాన్ ఫైనాన్సియల్ ట్రాన్సాక్షన్ మీద రూ.8.50 చెల్లించాలి.
ఐసీఐసీఐ బ్యాంకు సైతం దేశంలోని ఆరు మెట్రోపాలిటన్ సిటీల పరిధిలో సొంత ఏటీఎంల్లో ఐదు, ఇతర బ్యాంకు ఏటీఎంల్లో మూడు లావాదేవీలు ఉచితంగా అందిస్తుంది. పరిమితి దాటి జరిపే ప్రతి ఆర్థిక లావాదేవీపై రూ.20, ఆర్థికేతర లావాదేవీల మీద రూ.8.50 వసూలు చేస్తుంది. ఐసీఐసీఐ బ్యాంక్ ఏటీఎంలు, నాన్-ఐసీఐసీఐ బ్యాంక్ ఏటీఎంల్లో సేవలకు ఈ నిబంధన వర్తిస్తుంది.
యాక్సిస్ బ్యాంక్ సొంత ఏటీఎంల్లో మెట్రో సిటీల పరిధిలో ఐదు ఉచితంగా, ఇతర బ్యాంకుల ఏటీఎంల్లో మూడు లావాదేవీలు ఫ్రీగా చేసుకోవచ్చు. ఈ పరిమితి దాటిన ప్రతి నగదు విత్ డ్రాయల్పై రూ.21, ఆర్థికేతర లావాదేవీలపైన రూ.10 వసూలు చేస్తుంది.
పంజాబ్ నేషనల్ బ్యాంక్ (పీఎన్బీ) కూడా మెట్రో పాలిటన్ సిటీల పరిధిలో సొంత ఏటీఎంల్లో ఐదు, ఇతర బ్యాంకుల ఏటీఎంల్లో మూడు లావాదేవీల వరకు ఉచితంగా, . అంతకు మించి జరిపే ప్రతి లావాదేవీపై రూ.10, ఇతర బ్యాంకుల్లో పరిధి దాటిన ఆర్థిక లావాదేవీలపై రూ. 20, ఆర్థికేతర లావాదేవీల మీద రూ. 9 వడ్డిస్తుంది.