కర్ణాటకలో పర్యటన సందర్బంగా పలు అభివృద్ధి పనులకు శ్రీకారం చుడుతున్న ప్రధాని నరేంద్ర మోదీ ప్రపంచంలోనే అత్యంత పొడవైన రైల్వే ప్లాట్‌ఫారమ్‌ను ప్రారంభించి జాతికి అంకితం చేశారు. కర్ణాటకలోని శ్రీ సిద్ధారూఢ స్వామీజీ స్టేషన్‌లో ఈ ప్లాట్‌ఫారమ్‌ను ప్రారంభించారు. రైల్వే స్టేషన్ల పునర్నిర్మాణంలో భాగంగా రూ. 20.1 కోట్ల పెట్టుబడితో ఈ ప్లాట్‌ఫారమ్‌ను నిర్మించారు.
సిద్ధారూఢ స్వామి రైల్వే స్టేషన్‌లో 1.5 కిలోమీటర్ల పొడవైన రైల్వే ప్లాట్‌ఫారమ్ నిర్మాణ పనులు ఫిబ్రవరి 2021లో ప్రారంభించారు. ఈ స్టేషన్ కర్ణాటకలో ఒక ముఖ్యమైన జంక్షన్, బెంగళూరు (దావణగెరె వైపు), హోసపేట (గడగ్ వైపు), మరియు వాస్కో-డ-గామ/బెలగావి (లోండా వైపు) లను కలుపుతుంది.
మెరుగైన సేవలందించేందుకు ఇప్పటికే ఉన్న ఐదు ప్లాట్‌ఫారమ్‌లకు అదనంగా మరో మూడు ప్లాట్‌ఫారమ్‌లు ఏర్పాటు చేసారు. ప్లాట్‌ఫారమ్ నెం. 8, ఇది 1507 మీటర్లు, ప్రపంచంలోనే అత్యంత పొడవైన రైలుమార్గం ప్లాట్‌ఫారమ్‌గా గుర్తింపు పొందింది.
పొడవైన ప్లాట్‌ఫారమ్ నుండి, ఎలక్ట్రిక్ ఇంజన్లతో రెండు రైళ్లు ఒకేసారి బయలుదేరుతాయి. ప్రపంచంలోనే అత్యంత పొడవైన రైల్వే ప్లాట్‌ఫారమ్ హుబ్బళ్లి-ధార్వాడ్ ప్రాంతం యొక్క రవాణా అవసరాలను తీర్చగలదు మరియు యార్డు యొక్క కార్యాచరణ సామర్థ్యాన్ని పెంపొందించడంలో సహాయపడుతుంది.
