ప్రపంచవ్యాప్త అనిశ్చితి, కీలక సవాళ్ల నడుమ భారతదేశం దీపస్తంభంగా నిలిచిందని ప్రధాన మంత్రి నరేంద్ర మోదీ చెబుతూ ఈ అద్బుత ఘట్టంతో ప్రపంచం అంతా ఇప్పుడు భారత్ వైపు చూస్తోందని, పలు దేశాలకు ఇండియా ఇప్పుడు ప్రగతి ఛోదకం, విశ్వసనీయ స్నేహం, సుస్థిరతల పునాదిగా మారిందని పేర్కొన్నారు.
వెరసి భారతదేశం ఇప్పుడు ప్రపంచ స్థాయిలో ఏ కోణంలో చూసినా ‘విశ్వామిత్ర’ పాత్రకు చేరుకొంటోందని తెలిపారు. స్వరాష్ట్రం గుజరాత్లో ప్రధాని మోదీ 10వ వైబ్రెంట్ గుజరాత్ గ్లోబల్ సమ్మిట్ను ఉద్ధేశించి ప్రారంభోత్సవ ఉపన్యాసం చేస్తూ పలు కిష్టతల మధ్య ప్రపంచంలో కొన్నేళ్లుగా అలుముకున్న కారుమబ్బుల నడుమ భారతదేశం కాంతిపుంజం అయిందని తెలిపారు.
భారతదేశం ఆర్థిక పురోగతి రికార్డు స్థాయిలో ఉందని, ప్రధాన రేటింగ్ ఏజెన్సీలన్ని కూడా ఇదే అభిప్రాయం వ్యక్తం చేస్తున్నాయని చెప్పారు. వీటి అంచనాల మేరకు వచ్చే కొద్ది సంవత్సరాల్లోనే భారతదేశం ప్రపంచంలోనే భారతదేశం అతిపెద్ద మూడు ఆర్థిక శక్తివంత దేశాలలో ఒక్కటి అవుతుందని ప్రధాని భరోసా వ్యక్తం చేశారు.
పలు దేశాధినేతలు, ప్రముఖ కంపెనీల సిఇఓలు పాల్గొనే వైబ్రెంట్ గుజరాత్ స్థానికంగా మరిన్ని పెట్టుబడులు , వ్యాపారాల ఏర్పాటుకు ఉద్ధేశించింది. అత్యంత శరవేగంగా ప్రపంచ వ్యవస్థ సుడులు తిరుగుతూ మారుతోంది. ఈ దశలో భారతదేశం తన విశిష్టతను సాధించుకుంది. విశ్వామిత్ర పేరు సార్థకం చేసుకుందని ప్రధాని వివరించారు.
అయితే ఇది అంత తేలిగ్గా దక్కిన గుర్తింపు కాదంటూ ఇందుకు మనం వారసత్వ సంపదగా ఎంచుకున్న అంకితభావం, కష్టించేతత్వం, సంక్షేమ సమిష్టిత్వం వంటివి భారత్కు ప్రత్యేకతలను ఆపాదించాయని ప్రధాని వివరించారు. వీటితోనే భారత్ ఇప్పుడు గ్రోత్ ఇంజిన్ అయిందని, పలు దేశాలు ఈ విశ్వసనీయ సారధ్య పాటవాన్ని ఆదరిస్తున్నాయని ప్రధాని తెలిపారు.
ప్రజా కేంద్రీకృతిక ప్రగతిని మనం పాటిస్తాం, గ్లోబల్ సౌత్కు గొంతుక అయ్యామని, ఇదే దశలో ప్రపంచస్థాయి ప్రగతి ఛోదక పాత్ర పోషిస్తున్నామని, దీనిని ఇన్వెస్టర్లంతా పరిగణనలోకి తీసుకోవాలని విజ్ఞప్తి చేశారు. అన్నింటికి మించి భారతీయ యువత ప్రతిభాపాటవాలతో సాంకేతిక క్లిష్టతలకు పరిష్కారాలు దొరుకుతున్నాయిని చెప్పారు.
ఈ విధంగా మన దేశం ప్రతిభాయుత యువత పవర్హౌస్ అయిందని ప్రధాని తెలిపారు . ప్రపంచ స్థాయిలో సత్ఫలితాల సాధన దిశలో ఉన్న ప్రజాస్వామిక శక్తిగా మారిందని ఇది ఆద్యంతం అంతా గుర్తించాల్సిన విషయం అని ప్రధాని పేర్కొన్నారు.