ఊహాగానాలకు స్వస్తి పలుకుతూ జూలై 18న జరగనున్న రాబోయే రాష్ట్రపతి ఎన్నికలకు తాను అభ్యర్థిని కాదని బీహార్ ముఖ్యమంత్రి నితీష్ కుమార్ స్పష్టం చేశారు. “నేను రాష్ట్రపతి రేసులో లేను” అని ప్రకటించారు. ఆయన సారధ్యం వహిస్తున్న జెడి(యు) నేతలు గత నాలుగు నెలలుగా భారత రాష్ట్రపతి పదవికి అందరికి ఆమోదయోగ్యం కాగల అభ్యర్థిగా బీహార్ ముఖ్యమంత్రి నితీష్ కుమార్ పేరును ప్రచారం చేస్తున్నారు.
రాష్ట్రపతి ఎన్నికల షెడ్యూల్‌ను ఇటీవల ప్రకటించిన తర్వాత, ఆ పార్టీ శిబిరం నుండి ఈ మేరకు ప్రకటనలు వెలువడ్డాయి. ఆ పార్టీకి చెందిన బీహార్ మంత్రి శ్రవణ్ కుమార్ జూన్ 9న ఒక టీవీ ఛానెల్‌తో ఇలా అన్నారు: “నితీష్ కుమార్‌కి అద్భుతమైన పార్లమెంటరీ, శాసనసభ కెరీర్ ఉంది. ఆయన భారత రాష్ట్రపతికి మంచి అభ్యర్థి కావచ్చు. అలా జరిగితే మనమందరం చాలా గర్వపడతాం. ఇది బీహార్‌కు కూడా గర్వకారణం”.
అయితే, శనివారం మరో అదే పార్టీకి చెందిన మంత్రి సంజయ్ కుమార్ ఝా మాట్లాడుతూ, “నితీష్ కుమార్ 2025 వరకు బీహార్‌కు సేవ చేయడానికి ప్రజా తీర్పు పొందారు” అంటూ అధ్యక్ష పదవికి పోటీలో లేరన్నట్లు తెలిపారు. అదే రోజు, జెడి(యు) జాతీయ అధ్యక్షుడు రాజీవ్ రంజన్ సింగ్ అలియాస్ లలన్ సింగ్ ఈ విషయంపై మరింత సూటిగా మాట్లాడుతూ, “భారత రాష్ట్రపతి రేసులో నితీష్ కుమార్ లేరని” చెప్పారు.
దేశాధినేత పదవికి నితీష్ పేరును ముందుగా ప్రతిపాదించి, ఆ తర్వాత దానిని వెనక్కి తీసుకోవడం గమనించి “బాగా ఆలోచించిన వ్యూహం”లో భాగం అని రాజకీయ వర్గాలు భావిస్తున్నాయి. నితీష్ ఆమోదం లేకుండా జెడి(యు) నాయకుడు లేదా దాని అధికార ప్రతినిధి ఎవరైనా అలాంటి ప్రకటనలు ఇవ్వగలరా” అని కూడా రాజకీయ పరిశీలకులు అడుగుతున్నారు.
ఫిబ్రవరిలో, కుమార్ ఢిల్లీలో ఎన్నికల వ్యూహకర్త ప్రశాంత్ కిషోర్‌ను కలిసిన ఒక రోజు తర్వాత, నితీష్ అధికార భారతీయ జనతా పార్టీ నేతృత్వంలోని నేషనల్ డెమోక్రటిక్ అలయన్స్ రాష్ట్రపతి అభ్యర్థిగా కావడం గురించి చర్చలు జరిగాయి. దీనిపై జెడి(యు) సీనియర్ నాయకుడు కెసి త్యాగి ఆ తర్వాత ఇలా అన్నారు: “అది జరిగితే, అది జెడి (యు), మొదటి రాష్ట్రపతి డాక్టర్ రాజేంద్ర ప్రసాద్ తర్వాత రాష్ట్రపతిని పంపని బీహార్‌కు గొప్ప గౌరవం.”
