పాడి పశువులన్నింటికీ ఆధార్ కార్డు తయారు చేస్తామని ప్రధాని నరేంద్ర మోదీ వెల్లడించారు. దేశంలో డెయిరీ రంగాన్ని సైన్స్‌తో ముడిపెట్టి విస్తరిస్తున్నట్లు అంతర్జాతీయ పాడిపరిశ్రమ సదస్సును ప్రారంభిస్తూ తెలిపారు. పాడి జంతువులకు సంబంధించిన అతిపెద్ద డేటాబేస్‌ను భారత్ రూపొందిస్తోందని ఆయన చెప్పారు.
డెయిరీ రంగానికి సంబంధించిన ప్రతి జంతువును ట్యాగ్ చేస్తున్నట్లు తెలిపారు. కిసాన్ యోజన లేదా మరేదైనా ప్రభుత్వ సహాయం నేరుగా రైతు, పౌరుల ఖాతాకు వచ్చేందుకు ఆధార్ సహకరిస్తోంది. ఇప్పుడు ఆధార్ కార్డును గేదెలకు సైతం అందించాలని భావిస్తున్నట్లు ప్రధాని తెలిపారు.
ఆధార్ కార్డును రూపొందించడానికి బయోమెట్రిక్ సమాచారం అవసరం. అంటే వేలిముద్రలు, కళ్లు తదితర సమాచారం తీసుకుంటారు. ఈ విధంగా ఆధునిక సాంకేతిక పరిజ్ఞానంతో జంతువుల బయోమెట్రిక్ సమాచారాన్ని తీసుకుంటామని మోదీ తెలిపారు. ఈ ప్రచారానికి పశు ఆధార్ అని పేరు పెట్టారు.
జంతువుల ఆరోగ్యాన్ని దృష్టిలో ఉంచుకోవడంతో పాటు, పాల ఉత్పత్తులకు సంబంధించిన మార్కెట్‌ను విస్తరించేందుకు ఇది దోహదపడుతుందని మోదీ ఆశాభావం వ్యక్తం చేశారు. గుజరాత్ లోని కచ్ జాతికి చెందిన బన్నీ గేదె గురించి ప్రస్తావిస్తూ పగటిపూట అక్కడ చాలా వేడిగా ఉంటుందని, దీంతో ఈ గేదె రాత్రి పూట మేస్తుందని తెలిపారు.
పశుగ్రాసం కోసం ఆవుల కొట్టం నుంచి 15 నుంచి 17 కిలోమీటర్ల దూరం ప్రయాణిస్తుందని, కానీ రోజు తెల్లవారుజాము ప్రారంభమైన వెంటనే, అది ఆలస్యం చేయకుండా తన ఆవు వద్దకు తిరిగి వస్తుందని ప్రధాని చెప్పారు. బన్నీ గేదె తప్పుదారి పట్టడం లేదా దారి తప్పిపోవడం గురించి వినడం చాలా అరుదని పేర్కొన్నారు. విదేశాల్లోని వారు ఈ విషయం వింటే షాక్ అవుతారని ఆయన తెలిపారు.
