దేశంలో మహారాష్ట్ర-కర్ణాటక, అసోం-మేఘాలయల మధ్య సరిహద్దు వివాదాలు పరాకాష్టకు చేరుతున్న సమయంలో ఆంధ్ర ప్రదేశ్ – కర్ణాటకల మధ్య కూడా అటువంటి వివాదాలు చెలరేగే పరిస్థితులు కనిపిస్తున్నాయి. ఆంధ్రప్రదేశ్-ఒడిశాల మధ్య కొఠియా గ్రామాల సరిహద్దు పంచాయతీ నడుస్తూనే ఉంది. మహారాష్ట్రంలోని కొందరు గ్రామస్తులు తమను తెలంగాణాలో కలపమని కోరుతున్నారు.
ఈ నేపథ్యంలో కర్ణాటకకు చెందిన బిజెపి ఎమ్మెల్యే ఒకరు ఏపీలోని కొన్ని గ్రామాలను తమ రాష్ట్రంలో విలీనం చేయాలని డిమాండ్ లేవనెత్తారు. ప్రస్తుతం జరుగుతున్న కర్ణాటక అసెంబ్లీ సమావేశాల్లోనే ఆ ఎమ్మెల్యే ఈ సమస్యను ప్రస్తావించడం గమనార్హం.
కర్నూలు జిల్లాలోని ఆలూరు, ఆదోని, మంత్రాలయం నియోజకవర్గాల పరిధిలోని 40 గ్రామాలను కర్ణాటకలో కలిపి కన్నడ విద్యను ప్రోత్సహించాలని బళ్లారి జిల్లా శిరగుప్ప ఎమ్మెల్యే సోమలింగప్ప శాసనసభలో కోరారు. డిసెంబరు 22న ఎమ్మెల్యే శిరగుప్ప అసెంబ్లీలో ఆంధ్రప్రదేశ్‌లోని కన్నడ మాధ్యమం పాఠశాల విషయమైన మాట్లాడారు.
ఈ సందర్భంగా ఆంధ్రప్రదేశ్‌లో కన్నడ విద్య, కన్నడ పాఠశాలల స్థితిగతులపై వివరించారు. మూడేళ్ల కిందట 40 గ్రామాల్లో సుమారుగా 12 వేల మందికి పైగా విద్యాభ్యాసం చేస్తుంటే. ప్రస్తుతం 8 వేల మంది కన్నడ చదువుతున్నారని తెలిపారు. దీంతో పాటు ఉపాధ్యాయుల కొరత తీవ్రంగా వేధిస్తోందని, ఆ రాష్ట్ర ప్రభుత్వం నియామకాలు చేపట్టడం లేదని పేర్కొన్నారు.
కన్నడ భాష, విద్యను కాపాడుకోవాలంటే ఆ 40 గ్రామాలను కర్ణాటకలో విలీనం చేయడమే ఉత్తమమని ఆయన డిమాండ్ చేశారు. దీనిపై స్థానిక విద్యార్థి సంఘాల నాయకులు స్పందిస్తూ జిల్లాలో పాఠశాల సమస్యలు పక్క రాష్ట్ర పాలకులకు అర్థమవుతున్నా, మన పాలకులకు అర్థం కావడం లేదని ధ్వజమెత్తారు.
ఇప్పటికైనా విద్యార్థుల నిష్పత్తికి అనుగుణంగా ఉపాధ్యాయులను నియమించి, తరగతి గదులు, సకాలంలో పాఠ్యపుస్తకాలు పంపిణీ చేయాలని వారు డిమాండు చేశారు.
కర్ణాటక ఎమ్మెల్యే అసెంబ్లీలో చేసిన వ్యాఖ్యలపై ఆంధ్రప్రదేశ్ నేతలు ఇంత వరకూ స్పందించకపోవడం గమనార్హం. ఇక, కర్ణాటక, మహారాష్ట్ర సరిహద్దు వివాదం తీవ్రరూపం దాలుస్తోంది. మహారాష్ట్ర బస్సులపై కర్ణాటక రక్షణ వేదిక కార్యకర్తలు రాళ్లు రువ్వడం, మహారాష్ట్రలోని కొల్హాపుర, సాంగ్లి, పుణె జిల్లాల్లో కర్ణాటక బస్సులపై శివసేన కార్యకర్తలు దాడులు చేయడం వంటి ఘటనలు చోటుచేసుకున్నాయి.
