లాస్ ఏంజిల్స్‌లో మార్చిలో అట్టహాసంగా జరగనున్న ఆస్కార్ అకాడమీ అవార్డుల వేడుక కోసం యావత్ ప్రపంచం ఆసక్తిగా ఎదురు చూస్తోంది. ఈసారి ఈ వేడుకలో గతం కన్నా ఎక్కువ సంఖ్యలో భారతీయ సినిమాలు నామినేషన్స్ ని దక్కించుకుని పోటీపడుతుండటం ఆసక్తికరంగా మారింది.
ఇండియా నుంచి దాదాపు 10 సినిమాలు ఆస్కార్ నామినేషన్స్ కు అర్హత సాధించడం విశేషం. ముందుగా గుజరాతీ మూవీ ఛల్లో షో, ఆ తరువాత రాజమౌళి మూవీ ‘ఆర్‌ఆర్‌ఆర్’ మాత్రమే ఇండియా తరుపున విదేశీ సినిమాల విభాగంలో ఎంట్రీకి ఎంపికయ్యాయి. అయితే తాజాగా ఆ లిస్ట్ 10కి పెరగడం.. అందులో పలు క్రేజీ సినిమాలు వుండటంతో మన వాళ్లు ఆస్కార్ పై భారీగానే ఆశలు పెట్టుకుంటున్నారు.
ఆస్కార్ నామినేషన్స్‌కు ఛల్లో షో, ఆర్‌ఆర్‌ఆర్, వివేక్ అగ్నిహోత్రి రూపొందించిన ‘ది కశ్మీర్ ఫైల్స్’, రిషబ్ శెట్టి నటించి తెరకెక్కించిన ‘కాంతార’, కిచ్చా సుదీప్ నటించిన ‘విక్రాంత్ రోణ’, అలియా భట్ నటించిన ‘గంగూబాయి కతియా వాడీ’, మి వసంతరావ్, తుజ్యా సాథీ కహీ హై, రాకెట్రీ, ఇరవిన్ నిళల్ సినిమాలు అర్హత సాధించాయి.
వీటితో పాటు ప్రపంచ వ్యాప్తంగా 301 సినిమాలు ఆస్కార్ పురస్కారం కోసం పోటీపడుతున్నాయి. 95వ ఆస్కార్ అకాడమీ అవార్ట్‌కు నామినేట్ అయిన సినిమాలని ఈనెల 24న ప్రకటించనున్నారు. మార్చి 12న లాస్ ఏంజిల్స్‌లో ఆస్కార్ వేడుక అట్టహాసంగా జరగనుంది.
ఆర్‌ఆర్‌ఆర్ పాటకు గోల్డెన్ గ్లొబ్ అవార్డు
కాగా, గోల్డెన్ గ్లోబ్ అవార్డుల్లో ఆర్‌ఆర్‌ఆర్ మూవీ మెరిసింది. ఆర్‌ఆర్‌ఆర్ సినిమా చరిత్ర సృష్టించింది. ఆర్‌ఆర్‌ఆర్ రెండు విభాగాల్లో పోటీ పడుతోంది. ఆర్‌ఆర్‌ఆర్ సినిమాలోని నాటు నాటు పాటకు గోల్డెన్ గ్లోబ్ అవార్డు వరించింది. బుధవారం కాలిఫోర్నియాలో ది బెవర్లీ హిల్టన్ హాల్‌లో ఈ అవార్డుల కార్యక్రమం కనులవిందుగా జరిగింది.
ఈ కార్యక్రమంలో దర్శకుడు రాజమౌళి, నటులు రామ్ చరణ్, ఎన్‌టిఆర్, సంగీత దర్శకుడు కీరవాణి పాల్గొని సందడి చేశారు. నాటు నాటు పాటకు అవార్డు ప్రకటించినప్పుడు ఎన్‌టిఆర్, రామచరణ్, రాజమౌళ్లి చప్పట్లతో అలరించారు. ఈ ప్రస్తుతం ఈ వీడియో సోషల్ మీడియాలో వైరల్‌గా మారాయి.
ఆర్‌ఆర్‌ఆర్ సినిమా బెస్ట్ ఒరిజనల్ సాంగ్ అవార్డు గెలిచింది. ఈ అవార్డును ఎంఎం కీరవాణి అందుకున్నారు. చంద్రబోస్ నాటు నాటు పాటను రాయగా ప్రేమ రక్షిత్ కొరియోగ్రఫీ చేశాడు. ఆంగ్లేతర ఉత్తమ చిత్రం రేసులో ఆర్‌ఆర్‌ఆర్ నిలిచింది.
