టీడీపీకి చెందిన మాజీ మంత్రి పరిటాల రవీంద్రను ప్రత్యర్థులు హత్య చేసిన రీతిలోనే తనను కూడా హత్య చేస్తారని మాజీ మంత్రి, బీజేపీ రాష్ట్ర ఉపాధ్యక్షుడు ఆదినారాయణ రెడ్డి సంచలన ఆరోపణలు చేశారు. “నా భార్య నా జీవితం గురించి భయపడుతోంది, కానీ నేను ఆమెను ధైర్యంగా ఉండమని, నేను ఉన్నా లేదా లేకుండా జీవితంలో ముందుకు సాగాలని కోరాను” అని వెల్లడించారు.
అమరావతి రైతులు 800 రోజులు జరుపుకుంటున్న ఆందోళనకు బీజేపీ నేత సంఘీభావం తెలుపుతూ రాజశేఖర్ రెడ్డి సీఎంగా ఉన్నప్పుడు వైజాగ్లో వేల ఎకరాల భూములు కొన్న జగన్, ఈ భూముల విలువను పెంచేందుకు రాజధానిపై నరకయాతన పడ్డాడని ఆరోపించారు.
గత ప్రభుత్వంలో మంత్రిగా ఉన్నప్పుడు జగన్ అధికారంలోకి వస్తే విశాఖను రాజధానిగా చేస్తాడని చంద్రబాబుకు తెలియజేసిన తన జోస్యం నిజమైందని పేర్కొన్నారు. వైఎస్ వివేకా హత్యపై ఆదినారాయణ రెడ్డి వివేకా సన్నిహితులే చంపారని ఆరోపించారు.
వివేకాకు సన్నిహితులైన వ్యక్తులు అతన్ని చంపి, దానిని గుండెపోటుగా చిత్రీకరించడానికి ప్రయత్నించారని ధ్వజమెత్తారు. సాక్షి టీవీ కూడా ఇది సహజ మరణమని పేర్కొన్నప్పటికీ గుర్తు తెలియని వ్యక్తులు అతని తలకు కుట్లు వేసి సాక్ష్యాలను తుడిచిపెట్టే ప్రయత్నం చేశారని తెలిపారు.
అయినా సాక్షి తనపై, అప్పటి సీఎం చంద్రబాబుపై నిందలు మోపిందని, కానీ ఇప్పుడు వాస్తవాలు ఒక్కొక్కటిగా బయటకు వస్తున్నాయని ఆదినారాయణరెడ్డి చెప్పుకొచ్చారు. తెలంగాణ సీఎం కేసీఆర్ కొత్త రాజ్యాంగం కోసం పిలుపునిచ్చారని, అయితే ఏపీలో మాత్రం జగన్ తన రాజ్యాంగంపై ప్రభుత్వాన్ని నడుపుతున్నారని మండిపడ్డారు.
ఏపీలో భారత్ (భారత) రాజ్యాంగానికి బదులు భారతి రాజ్యాంగాన్ని అమలు చేస్తున్నారని ఎద్దేవా చేశారు. అమరావతి రింగ్ రోడ్డుకు కేంద్రం రూ.20 వేల కోట్లు ఇస్తానంటే జగన్ తిరస్కరించారని బీజేపీ నేత ఆరోపించారు.
